Бүгін А.Оразбаева атындағы ЖББНМ-нің ұйымдастыруымен аталмыш мектеп базасында    Елбасының «Болашаққа бағдар: рухани жаңғыру» бағдарламалық мақаласы аясында,  «Елордамыз Астанаға 20 жыл»  толуына орай  оқушылар арасында қазақтың ұлттық ойыны тоғызқұмалақтан сайыс өтті. Тартысты өткен додада Т.Жароков атындағы ЖББОМ-нан, №1 мектеп-лицейден, мектептен тыс жұмыстар орталығынан спортшы-оқушылар бақ сынады. Ата-бабамыздан  аманат болған  тоғызқұмалақ – рухани  байлықтың  көзі.  «Тоғызқұмалақ» ойыншының жылдам ойлауына, есептеудің түрлі тәсілдерін  меңгеруіне  ықпал етеді. Сондай-ақ адамның ойлау қабілетін  дамытып, ойын барысында сезімталдықты шыңдап, адамның рухани байлығын арттырады. Сайыс соңында жеңімпаздар анықталып, марапатталды.

Ә.Сірәлі

Бүгін Жәнібек аудандық жастармен жұмыс жөніндегі ресурстық орталықтың кеңесші маманы Миржан Иманбаевтың, аудандық орталық аурухананың салауатты өмір салтын қалыптастыру дәрігері және медбикесі Зина Тілепованың, аудандық қоғамдық денсаулық сақтау басқармасының жетекші маманы Іңкәр Хасаинованың қатысуымен 7 сәуір – Дүниежүзілік денсаулық күніне орай аудан орталығындағы супермаркетте, дүкендерде, бірқатар мекеме-ұйымдарда «Сау болу – оңай!» ұранымен акция өткізілді. Ондағы мақсат – салауатты өмір салтын қалыптастыра отырып, әр адамның өз денсаулығына жауапты екенін ұғындыру, соған назар аударту, денсаулықтың маңыздылығы мен құндылығын түсіндіру. Акция барысында дүкенге келушілер мен мекеме қызметкерлерінің артериалдық қан қысымы өлшеніп, оларға түрлі созылмалы аурулардың алдын алу бойынша кеңестер беріліп, ақпараттық жадынамалар таратылды. Осындай шара аудандық орталық ауруханада да «Ашық есік» түрінде ұйымдастырылып, ниет танытқандар дәрігер мамандар тарапынан түрлі кеңестер алды.

А.ЕСІРКЕПОВ

Бүгін «Нұр Отан» партиясы аудандық филиалы  ғимаратында  аудан әкімі Азамат Сафималиев тұрғындарды қабылдады. Жиынға дербес бөлім басшылары да қатысты. Қабылдауға жазылған тұрғындардың басым бөлігі тұрғын үйге қол жеткізу бағытындағы сұрақтарымен келді. Жас маман  Ботакөз Бөкенова «Дипломмен ауылға» мемлекеттік бағдарламасы бойынша үй алу, Әлібек Қаленбаев, Рауза Үмбетәлиева, Тұрсынгүл Оразгелдиева,Әлия Рахматуллина, Ұлпаш Хабделова, Нұржамал Иманқұлова, Оралгүл Бөкенбаева тұрғын үйден көмек сұрап, сұраққа қатысты бөлім басшыларынан санат бойынша кезекте тұру немесе кезегінің жылжуы туралы ақпарат алды.  Ал Жұмабике Есқайырова, Қарлығаш Бисенғалиева, Аян Орынғалиев, Темірлан Жанболатов жұмысқа орналасу жөнінде жәрдем сұрады.  Аудан әкімі тарапынан қабылдауға келген әр тұрғынға тиісінше жауап берілді. Сондай-ақ жер телімі, мекенжайға тіркелу сынды түйіткілді сұрақтарымен келген тұрғындарда болды. Жұмысқа орналастыру  мәселесі бойынша  аудан әкімі жоспарда жазғы уақытта жүргізілетін бірқатар құрылыс нысандары бар екенін  айта келе, оған біраз жігіттердің тартылатынын жеткізді.

Ә.Қуанғалиева

Жәнібек аудандық ауыл шаруашылығы бөлімінің басшысы Арман Исқақовтың мәліметінше үстіміздегі жылы мал шаруашылығы саласы бойынша игерілетін субсидия қаржысының көлемі 364 520 000 теңгені құрайды. Оның айтуынша асыл тұқымды мал шаруашылығын дамытуды субсидиялаумен бірге мал шаруашылығы өнімінің өнімділігі мен сапасын арттыруды субсидиялауды жүзеге асыру мақсатында демеуқаржы беріледі. Осы мақсатта биыл ауданға қозы етін өндіріп, сатқаны үшін 3 750 000 теңге, ірі қара малын бордақылауға 6 000 000 теңге субсидия бөлінген.

                                                                                           Н.Өтей