Кеше Мәдениет және өнер қызметкерлерінің кәсіби мерекесіне орай Жәнібек аудандық мәдениет үйінде аудан мәдениет қызметкерлерінің және аудан әкімінің орынбасары Біржан Меңешовтың қатысуымен жиын болып өтті. Күн тәртібіне төрт мәселе ұсынылып, аудандық мәдениет, тілдерді дамыту, дене шынықтыру және спорт бөлімінің басшысы Б.Шарафутдинов «2017 жылы және 2018 жылдың 5 айында атқарылған жұмыстар туралы», «Рухани қазына» кіші бағдарламасының менеджері Г.Ниязалиева «Рухани қазына» кіші бағдарламасы аясында биылғы 5 айда тындырылған істер туралы», Ұзынкөл ауылдық мәдениет үйінің директоры Е.Әубекеров «Ұзынкөл ауылдық мәдениет үйі бойынша өткен жылы атқарылған және биылғы алда тұрған міндеттер туралы», Қамысты ауылдық модельді кітапханасының басшысы Г.Иқсанова «ОКЖ бойынша былтыр атқарылған жұмыстар мен биылғы алда тұрған міндеттер туралы» баяндап өтті. Жиында сөз сөйлеген Біржан Нұрланұлы мәдениет қызметкерлерін төл мерекелерімен құттықтап, ОКЖ-нің ақпаратты-библиография бөлімінің кітапханашысы Ж.Бірмановаға облыс әкімінің, Қамысты ауылдық модельді кітапханасының басшысы Г.Иқсанова, ОКЖ әдістеме бөлімінің басшысы Н.Мұқанбетқалиева, Тегісшіл бөлімше кітапханашысы Г.Исқақова, Өнеге бөлімше кітапханашысы Д.Еркеғұлова, аудандық балалар кітапханасының басшысы Ж.Тұяқова, Жақсыбай ауылдық мәдениет үйінің директоры Н.Бақтыгереева, аудандық «Ақмаржан» халықтық-би ұжымының балетмейстері З.Мұратоваларға облыстық мәдениет, құжаттама және архивтер басқармасының, аудандық ОКЖ-нің директоры С.Жукина, Жақсыбай ауылдық кітапханасының меңгерушісі С.Айтуғанова, аудандық мәдениет үйінің саз сүйемелдеушісі Р.Кәрімов, демалыс орталығының кадр бөлімінің инспекторы И.Байрамова, Жақсыбай ауылдық мәдениет үйінің мәдени ұйымдастырушысы З.Жұмағалиеваларға аудан әкімінің алғысхаттарын салтанатты түрде табыс етті.

А.ЕСІРКЕПОВ

Таяуда көршілес Бөкей Ордасы ауданының Бисен ауылында Бекболат Құбиевті еске алуға арналған қазақ күресінен 2005-2006 жылы туған кіші жасөспірімдер арасында аудандық турнир оздырылған болатын. Бөкей Ордасы, Жаңақала, Жәнібек аудандарының балғын палуандары бақ сынасқан  бәсекеде сегіз салмақ дәрежесінің төртеуін жәнібектік спортшылар еншіледі. Атап айтқанда, Әлижан Рахмушев (35 келі), Саят Нұрсұлтан (38 келі), Айдар Есболатов (42 келі), Дарын Асқаров (50 келі) турнир жеңімпазы атанса, Әлімжан Жұмағалиев (46 келі) екінші, Муса Думан (35 келі) мен Манас Ережепов (46 келі) үшінші орындарды еншіледі. Жас палуандарды Сырым Байсов пен Ерғазы Темірғалиев жаттықтырады. Г.ТӨРЕҒАЛИЕВА              

Жәнібек аудандық қорғаныс істері жөніндегі бөлім бастығының міндетін уақытша атқарушы  Данияр Қайсағалиевтың мәліметінше, биылғы көктемгі әскерге шақырту кезінде аудан бойынша 229  жас әскер қатарына шақырылса, содан күні бүгін 179 шақырылушы шақыру пунктіне ат ізін салып отыр. Ал әскерге шақыртқан 50 азамат әлі күнге дейін шақыртуға құлақ аспауда. Олар Ақтау, Атырау, Орал және тағы да басқа қалаларда жұмыс істейтіндіктерін желеу етіп келмей жүр. Аталған бөлім бастығының міндетін уақытша атқарушының бізге берген мәліметіне сүйенсек, әскери міндетін атқаруға шақырушылардың арасындағы 21 жас әскерге баруға уақытша жарамсыз болып шықты. Сол сияқты 46 шақырылушы кейінге қалдырылса, соның ішінде 30 жас әртүрлі оқу орындарында білім алуда. Сондай-ақ 11 шақырылушы отбасы жағдайына байланысты және  ауылдық жерлерде мұғалім болып қызмет атқаратын 5 шақырылушы да заңдылыққа сай  босатылған. Әскерге шақырылушылардың ішінде жат діни ағым бірлестіктеріне тіркелгендер жоқ.  

                                                                                                    Н.Өтей