19.06.2020, 11:16
Қараулар: 128
Есімдер құпиясын ескеріп жүрміз бе?

Есімдер құпиясын ескеріп жүрміз бе?

Балаға ат қоюдың қаншалықты маңызды екеніне мән бермейтіндер көп. Сол себепті, әдемі естілетініне қызығып, көбіне мағынасыз аттарды қоя салады.

Ойлап көріңізші, Даяна, Диана, Аруна, Рифхат, Равиль, Рамиль деген есімдерде не мағына бар? Мамандар адамның есімі болашағына, тағдырына әсер ететінін растайды. Мысалы, Батыр, Алпамыс, Қайрат, Қайсар сияқты қатқыл есімді балалар өмірде де батыл, дербес болып өседі. Мінезі өжет болып қалыптасады. Ал Байсал, Сабыр, Мейірім есімді балалар байсалды, сабырлы, мейірімді болып келеді деген пікір қалыптасқан.

Бір қызығы, сәбидің қай мезгілде, қай айда дүниеге келгендігі де оның мінезінің қалыптасуына ықпал ететін көрінеді. Деректерге сүйенсек, қыста ынталы, талапты балалар дүниеге келеді. Кілең жуан дыбыстардан тұратын қатқыл есімнің қойылуы олардың осы қасиетін одан әрі ұштап, дамыта түседі. Желтоқсанда туған балалар тік мінезді, өте өктем, ал қаңтар мен ақпанда туған балалар байсалдырақ болады. «Бірақ, қыста туған сәбилер есейгенде өздерінің қырсықтығының кесірінен ешкіммен сыйыса алмай қиналады. Олар әрдайым елдің алдында болғысы келеді. Егер сіз оның табиғат берген қатал мінезін жұмсартқыңыз келсе, жұмсақ есім таңдаңыз», — дейді экстрасенс Заман Сыпатаев.

Көктемде туған балалар тез ренжігіш, сезімтал, әсершіл. Олардың көпшілігі тумысынан дарынды, бірақ өздеріне сенімді емес. Осы жасқаншақ, жігерсіз мінезі олардың көшбасшы болуына кедергі. Сондықтан қайраттандыру үшін оларға қатқыл есім таңдаған жөн.

Жазда туған балаларға, негізінен, белсенділік пен тәкаппарлық, батылдық тән. Күзде туған балалар өте әмбебап, алғыр және сабырлы. Не істесе де көп ойланып-толғанады. Бірақ мінездері жеңілтектеу. Оларға ат таңдау соншалықты қиын емес, себебі күзгі балалардың табиғатына ештеңе әсер етпейді.

Жалпы, балаға ат қоюда есімдер құпиясын ескермеуге болмайды. Біріншіден, есім қалай дыбысталады, соған мән берген жөн. Ары қарай мағынасына көңіл бөлу керек. Мәселен, қыз балаға сұлулық, парасаттылық, ақылдылық қасиеттерін қамтитын есімдер лайық. Ал балаңыз ұл болса және сіз оның болашақта қажырлы да қайратты, дәулетті және ер мінезді адам болып өскенін қаласаңыз, есімін де соған орайластырып қойғаныңыз абзал.

Сонымен, өз балаңыздың қандай болғанын қалайсыз, есімін де соған қарай таңдаңыз. Ат қою – өте жауапты іс. Сондай-ақ әр ата-ана өз баласының бақытты, табысты болуына және үйлесімді өмір сүруіне ықпал ете алады.

Асқар ҚҰСАЙЫНОВ